შინაგან საქმეთა სამინისტრომ თბილისში, საცხოვრებელ კორპუსში მომხდარი ცოლ-ქმრის მკვლელობის საქმე ცხელ კვალზე გახსნა. დაკავებულია ერთი პირი.

უწყების ინფორმაციით, შემთხვევა 11 ნოემბერს მოხდა. გამოძიების თანახმად, ბრალდებულმა ცოლ-ქმარს მათივე საცხოვრებელ კორპუსში ავტომატური ცეცხლსასროლი იარაღიდან ესროლა და შემთხვევის ადგილიდან მიიმალა.

მიღებული დაზიანებების შედეგად ორივე ადამიანი ადგილზე გარდაიცვალა.

**გამოძიების ინფორმაციით, მკვლელობას წინ ქონებრივ საკითხებთან დაკავშირებული უთანხმოება უძღოდა.** კერძოდ, საქმე ბრალდებულის მიერ ფინანსური ვალდებულებების შეუსრულებლობას უკავშირდება.

სამართალდამცველებმა ჩატარებული საგამოძიებო მოქმედებების შედეგად ეჭვმიტანილი ცხელ კვალზე დააკავეს.

გამოძიება სისხლის სამართლის კოდექსის 109-ე და 236-ე მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.

**წყარო:** საქართველოს შინაგან საქმეთა სამინისტრო, 12 ნოემბერი, 2026 წელი.