რუსთავში, მუნიციპალური ავტობუსის ეკრანზე, მგზავრობის დროს, სავარაუდოდ, პორნოგრაფიული შინაარსის ვიდეო ჩაირთო. შემთხვევის შესახებ ინფორმაცია სოციალურ ქსელში ერთ-ერთმა მოქალაქემ გაავრცელა.

მოქალაქის განცხადებით, შემთხვევა №4 მარშრუტის ავტობუსში მოხდა, რომლითაც არასრულწლოვნებიც მგზავრობდნენ.

„დღეს #4 ავტობუსით იმგზავრეს ბავშვებმა. მოულოდნელად ეკრანზე ჩაირთო პორნო. საზოგადოებრივ ავტობუსში! არ ვიცი მგზავრმა გააზიარა ეკრანზე თუ როგორ ჩაირთო, მაგრამ ეს არის მიუღებელი. ვერ გამორთო ეკრანი მძღოლმა და მონიტორს ქურთუკი დააფარა“, წერს მოქალაქე სოციალურ ქსელში.

გავრცელებული ინფორმაციით, მძღოლმა ეკრანის გამორთვა ვერ შეძლო და მონიტორს ქურთუკი გადააფარა, რათა მგზავრებს ვიდეო აღარ დაენახათ.

ადგილობრივი გამოცემა „ინფო რუსთავი“ მომხდართან დაკავშირებით რუსთავის მერიას დაუკავშირდა.

მერიის განმარტებით, სავარაუდოდ, ადგილი ჰქონდა კიბერშეტევას. უწყების ცნობით, ინფორმაციის მიღებისთანავე შესაბამისი რეაგირება განხორციელდა და უსაფრთხოების მიზნით მუნიციპალურ ავტობუსებში ეკრანები გაითიშა.

ამ ეტაპზე უცნობია, როგორ მოხვდა ვიდეო ავტობუსის მონიტორზე და ჰქონდა თუ არა ადგილი სისტემაში უნებართვო შეღწევას.

ასევე, ჯერჯერობით არ გავრცელებულა ინფორმაცია, მიმდინარეობს თუ არა მომხდართან დაკავშირებით ოფიციალური ტექნიკური მოკვლევა.

წყარო: „ინფო რუსთავი“, მოქალაქის სოციალურ ქსელში გავრცელებული განცხადება.