საქართველოში დაბრუნებული საქართველოს მოქალაქეების რაოდენობამ ქვეყნიდან ემიგრაციაში წასულთა რაოდენობას გადააჭარბა. ამის შესახებ პრემიერ-მინისტრმა ირაკლი კობახიძემ დუბლინში, საერთაშორისო და ევროპულ საქმეთა ინსტიტუტში გამართულ დისკუსიაზე განაცხადა.
პრემიერის შეფასებით, აღნიშნული ტენდენცია საქართველოს ეკონომიკის ბოლო წლების ზრდას უკავშირდება. მისი თქმით, ეკონომიკური პირობების გაუმჯობესებამ შესაძლოა მოქალაქეების საზღვარგარეთ გამგზავრების მოტივაცია შეამციროს.
საქართველოს სტატისტიკის ეროვნული სამსახურის მონაცემებით, 2025 წელს ქვეყანაში 62 073 საქართველოს მოქალაქე დაბრუნდა, ხოლო ემიგრაციაში 58 799 მოქალაქე წავიდა. შესაბამისად, დაბრუნებულთა რაოდენობამ წასულთა რაოდენობას 3 274 ადამიანით გადააჭარბა.
ამავე პერიოდში, ყველა მოქალაქეობის გათვალისწინებით, საქართველოში 131 501 იმიგრანტი შემოვიდა, ხოლო ქვეყნიდან 114 374 ემიგრანტი გავიდა.
მიუხედავად დადებითი წლიური მაჩვენებლისა, ემიგრაცია საქართველოსთვის მნიშვნელოვან გამოწვევად რჩება. ბოლო ათწლეულის მონაცემებით, ქვეყნიდან წასული საქართველოს მოქალაქეების საერთო რაოდენობა დაბრუნებულთა რაოდენობას კვლავ მნიშვნელოვნად აღემატება.
ირაკლი კობახიძის განცხადებით, საქართველოსა და ევროპის განვითარებულ ქვეყნებს შორის ეკონომიკური განსხვავებების შემცირებამ მომავალში შესაძლოა ემიგრაციის მაჩვენებელზეც დადებითად იმოქმედოს.