გაერომ დედამიწის კლიმატის ცვლილების შესახებ ახალი ანგარიში გამოაქვეყნა, რომლის მიხედვითაც, გლობალური დათბობის პროგნოზი გასულ წელთან შედარებით გაუარესდა.

გაეროს გარემოს დაცვის პროგრამის (UNEP) შეფასებით, თუ ქვეყნები არსებულ პოლიტიკას არ შეცვლიან, საუკუნის განმავლობაში დედამიწის საშუალო ტემპერატურა შესაძლოა 2.8°C-ით გაიზარდოს ინდუსტრიამდელ პერიოდთან შედარებით.

ანგარიშის თანახმად, ქვეყნების მიერ კლიმატის დაცვისთვის აღებული ვალდებულებების სრულად შესრულების შემთხვევაშიც კი დათბობა დაახლოებით 2.6°C-ს მიაღწევს.

მეცნიერები აფრთხილებენ, რომ ტემპერატურის მატება ზრდის ძლიერი სიცხეების, ხანძრების, გვალვების, წყალდიდობებისა და სხვა სტიქიური მოვლენების რისკს.

გაეროს შეფასებით, დათბობის შესაზღუდად აუცილებელია სათბურის აირების გამონაბოლქვის მკვეთრი შემცირება. კერძოდ, 2025 წლის დონესთან შედარებით, 2030 წლისთვის გამონაბოლქვი 18%-ით, ხოლო 2035 წლისთვის 45%-ით უნდა შემცირდეს.

სპეციალისტების განცხადებით, განახლებადი ენერგიის განვითარება, წიაღისეული საწვავის მოხმარების შემცირება და ტყეების დაცვა კლიმატის ცვლილებასთან ბრძოლის მნიშვნელოვანი გზებია.

გაერო ხაზგასმით აღნიშნავს, რომ მდგომარეობის გაუმჯობესება ჯერ კიდევ შესაძლებელია, თუმცა ამისთვის ქვეყნებმა სწრაფად და ერთობლივად უნდა იმოქმედონ.