საქართველოს პრემიერ-მინისტრი ირაკლი კობახიძე გაეროს გენერალური ასამბლეის 81-ე სესიაზე სიტყვით გამოვიდა. გამოსვლის ძირითადი თემები იყო მშვიდობა, საერთაშორისო თანამშრომლობა, საქართველოს სუვერენიტეტი და ტერიტორიული მთლიანობა, სამხრეთ კავკასიის მომავალი და ქვეყნის ეკონომიკური განვითარება.   ჩასმული ტექსტი გაეროს 81-ე სესიის გენერალური დებატები ნიუ-იორკში 22-28 სექტემბერს იმართება.
კობახიძემ განაცხადა, რომ საერთაშორისო გამოწვევების ფონზე საქართველოსთვის ერთ-ერთ მთავარ პრიორიტეტად მშვიდობის შენარჩუნება და საერთაშორისო თანამშრომლობის გაძლიერება რჩება. მისი თქმით, ხანგრძლივი მშვიდობის მიღწევა ძალის გამოყენებით შეუძლებელია და ის დიალოგს, ურთიერთგაგებასა და ურთიერთპატივისცემას უნდა ეფუძნებოდეს.   ჩასმული ტექსტი
პრემიერ-მინისტრმა გამოსვლისას რუსეთის მიერ საქართველოს ტერიტორიების ოკუპაციაზეც ისაუბრა.
„ჩვენი ქვეყნის ტერიტორიის ოცი პროცენტი კვლავ ოკუპირებულია რუსეთის ფედერაციის მიერ, ხოლო ასობით ათასი ჩვენი მოქალაქე კვლავ იძულებით გადაადგილებულია და საკუთარ სახლში დაბრუნებას ვერ ახერხებს“, - განაცხადა კობახიძემ.   ჩასმული ტექსტი
მან ასევე მიმართა აფხაზებსა და ოსებს და განაცხადა, რომ საქართველოს ეკონომიკური განვითარებით მიღებული სარგებელი ოკუპირებულ რეგიონებში მცხოვრები ადამიანებისთვისაც ხელმისაწვდომი უნდა გახდეს. მისი თქმით, საქართველოს ხელისუფლება სამხრეთ კავკასიაში თანამშრომლობის გაძლიერებისა და კონფლიქტების მშვიდობიანი გადაწყვეტის მხარდაჭერას განაგრძობს.   ჩასმული ტექსტი
გამოსვლის მნიშვნელოვანი ნაწილი საქართველოს სატრანზიტო და ეკონომიკურ შესაძლებლობებს დაეთმო. კობახიძის განცხადებით, საქართველო სამხრეთ კავკასიისა და შუა დერეფნის მნიშვნელოვანი ნაწილია და ცენტრალური აზიის ევროპასთან დაკავშირებაში მნიშვნელოვანი როლის შესრულება შეუძლია. მან აღნიშნა, რომ ქვეყანა 2032 წლამდე მსხვილ სატრანსპორტო ინფრასტრუქტურულ პროექტებში 7 მილიარდი აშშ დოლარის ინვესტირებას გეგმავს.   ჩასმული ტექსტი
პრემიერის განცხადებით, საქართველოს ეკონომიკა ბოლო ხუთი წლის განმავლობაში საშუალოდ წლიურად 9.3%-ით იზრდებოდა, ხოლო 2026 წლის პირველი შვიდი თვის ეკონომიკურმა ზრდამ 7.9% შეადგინა. მან ასევე ისაუბრა სიღარიბის შემცირებასა და მთავრობის მიზანზე, რომ მომდევნო წლებში ეკონომიკური ზრდის შედეგები ქვეყნის რეგიონებზე უფრო ფართოდ გადანაწილდეს. ეს მაჩვენებლები კობახიძემ თავის გამოსვლაში წარმოადგინა.   ჩასმული ტექსტი
სიტყვის დასასრულს კობახიძემ განაცხადა, რომ საქართველო მზად არის ყველა საერთაშორისო პარტნიორთან თანამშრომლობისთვის „ურთიერთპატივისცემისა და სუვერენული თანასწორობის საფუძველზე“. მისი თქმით, ხანგრძლივი პარტნიორობა დიალოგით მიიღწევა და არა ზეწოლით ან იძულებით.   ჩასმული ტექსტი