საფრანგეთის ხელისუფლება 24 ოქტომბრისთვის დაგეგმილი მასშტაბური საპროტესტო აქციების წინ უსაფრთხოების ზომებს ამკაცრებს. ქვეყნის მასშტაბით 70 000 პოლიციელისა და ჟანდარმის მობილიზება იგეგმება.
23 ოქტომბრის ინფორმაციით, ხელისუფლება ცდილობს თავიდან აიცილოს გასულ კვირას მომხდარი არეულობის განმეორება, როდესაც დემონსტრაციებს რამდენიმე ქალაქში შეტაკებები, ხანძრები და მაღაზიების დარბევა მოჰყვა.
საფრანგეთის შინაგან საქმეთა მინისტრის, ლორან ნუნიესის განცხადებით, სამართალდამცველთა რაოდენობა წინა კვირასთან შედარებით 10 000-ით გაიზრდება. უსაფრთხოების უზრუნველყოფაში სპეციალური დანაყოფები, ვერტმფრენები, დრონები და ჯავშანტექნიკაც ჩაერთვებიან.
პარიზსა და საფრანგეთის სხვა ქალაქებში დემონსტრაციების ნაწილზე შეზღუდვები დაწესდა. მიუხედავად ამისა, სტუდენტური ორგანიზაციები და საპროტესტო მოძრაობები აქციების გამართვას გეგმავენ.
პროტესტის მთავარი მიზეზებია ცხოვრების გაძვირება, საწვავის ფასების ზრდა და საჯარო მომსახურების ხარისხით უკმაყოფილება.
მოსალოდნელი არეულობის გამო 24 ოქტომბერს პარიზში რამდენიმე კულტურული დაწესებულება, მათ შორის ლუვრის მუზეუმი, დაიხურება.
საფრანგეთის ხელისუფლება აცხადებს, რომ ძალადობისა და ქონების დაზიანების თავიდან ასაცილებლად მკაცრ ზომებს მიიღებს.
