მსოფლიო დღეს, 31 ოქტომბერს, ჰელოუინს აღნიშნავს. ქუჩები გოგრის ფარნებითა და ფერადი დეკორაციებით ირთვება, ადამიანები უჩვეულო კოსტიუმებს იცვამენ და სხვადასხვა გასართობ ღონისძიებაში მონაწილეობენ.

ჰელოუინი განსაკუთრებით პოპულარულია აშშ-ში, კანადაში, ირლანდიასა და დიდ ბრიტანეთში, თუმცა ბოლო წლებში საქართველოშიც გავრცელდა.

დღესასწაულის ისტორია ძველ კელტურ ტრადიციას უკავშირდება. საუკუნეების წინ ადამიანები ამ დროს ზამთრის მოახლოებას აღნიშნავდნენ და სჯეროდათ, რომ ცოცხალთა და გარდაცვლილთა სამყაროს შორის საზღვარი ბუნდოვანი ხდებოდა.

ჰელოუინის მთავარი სიმბოლო განათებული გოგრაა. ეს ტრადიცია ირლანდიიდან მოდის, სადაც თავდაპირველად ფარნებს თალგამისგან ამზადებდნენ. მოგვიანებით ამერიკაში გოგრის გამოყენება დაიწყეს.

დღეს ჰელოუინი ძირითადად გართობასთან ასოცირდება. ადამიანები კოსტიუმირებულ წვეულებებს აწყობენ, ბავშვები კი კარდაკარ დადიან და ტკბილეულს აგროვებენ.

საქართველოში ჰელოუინი ტრადიციული დღესასწაული არ არის, თუმცა ახალგაზრდებში პოპულარობით სარგებლობს. თბილისში და სხვა ქალაქებში ამ დღეს თემატური წვეულებები და გასართობი ღონისძიებები იმართება.