აშშ-ის ქალაქ ატლანტაში 30-31 ოქტომბერს G20-ის ქვეყნების საგარეო საქმეთა მინისტრების შეხვედრა იმართება. თუმცა უკრაინასა და ახლო აღმოსავლეთში მიმდინარე ომების გამო მონაწილე სახელმწიფოებს შორის მნიშვნელოვანი უთანხმოებაა.
დიპლომატები ვარაუდობენ, რომ არსებული დაპირისპირება ქვეყნებს ერთობლივი განცხადების მიღებასა და საერთო გადაწყვეტილებების შეთანხმებაში ხელს შეუშლის.
შეხვედრას აშშ-ის სახელმწიფო მდივანი მარკო რუბიო მასპინძლობს. მონაწილეებს შორის არის რუსეთის საგარეო საქმეთა მინისტრი სერგეი ლავროვიც, რომლის დასწრებამ ევროპელ პარტნიორებს შორის უკმაყოფილება გამოიწვია.
ამასთან, შეხვედრაზე უკრაინა არ მიიწვიეს. მიწვევა არც სამხრეთ აფრიკის რესპუბლიკას მიუღია, მიუხედავად იმისა, რომ ქვეყანა G20-ის წევრია.
უთანხმოება იმდენად მწვავეა, რომ ევროპელი ოფიციალური პირების ნაწილი საერთო ფოტოს ორ ვერსიასაც განიხილავს: ერთს ლავროვთან ერთად, მეორეს კი მის გარეშე.
აშშ შეხვედრაზე საერთაშორისო ვაჭრობის, ენერგეტიკული უსაფრთხოებისა და კრიტიკული მინერალების მიწოდების საკითხებზე თანამშრომლობის გაძლიერებას ცდილობს.
თუმცა უკრაინის ომი, ახლო აღმოსავლეთში არსებული ვითარება და ქვეყნებს შორის განსხვავებული პოლიტიკური პოზიციები შეთანხმების მიღწევას ართულებს.
ატლანტაში მიმდინარე შეხვედრა დეკემბერში, მაიამიში დაგეგმილი G20-ის ლიდერთა სამიტისთვის მოსამზადებელი ეტაპია.