სოციალურად დაუცველი ოჯახების მონაცემთა ბაზის გადამოწმების შედეგად საარსებო შემწეობის მიმღებთა რაოდენობა მნიშვნელოვნად შემცირდა. ჯანდაცვის მინისტრ მიხეილ სარჯველაძის განცხადებით, ამ დროისთვის უკვე დაახლოებით 80 000 ოჯახია გადამოწმებული და პროცესი მომავალშიც გაგრძელდება.
გადამოწმების დაწყებისას საარსებო შემწეობის მიღების უფლების მქონე ოჯახების რაოდენობა დაახლოებით 184 000 იყო. არსებული მონაცემებით, დაახლოებით 35 000-მდე ოჯახს შემწეობის მიღება შეუწყდა.
მინისტრის განმარტებით, ოჯახების გადამოწმება ერთჯერადი პროცესი არ არის. სოციალური მდგომარეობის ცვლილების შესაბამისად ხდება სარეიტინგო ქულების ხელახალი დათვლა, რის შედეგადაც ოჯახმა შესაძლოა დახმარების მიღების უფლება დაკარგოს ან, პირიქით, მოიპოვოს.
სარჯველაძის თქმით, სახელმწიფომ სოციალურად დაუცველი ოჯახების აქტიური გადამოწმება თებერვლიდან განაახლა. მანამდე, პანდემიის პერიოდში დაწესებული მორატორიუმის გამო, პროცესი ხანგრძლივი დროის განმავლობაში შეჩერებული იყო.
მინისტრი აცხადებს, რომ მონაცემთა ბაზის სრულად მოწესრიგების შემდეგ სახელმწიფო ბიუჯეტში რამდენიმე ათეული მილიონი ლარის დაზოგვაა მოსალოდნელი. მისი თქმით, ზუსტი თანხის დასახელება ამ ეტაპზე შეუძლებელია, რადგან ბაზა მუდმივად იცვლება — მას ახალი ოჯახები ემატებიან, ნაწილი კი სისტემას ტოვებს.
აგვისტოს მდგომარეობით, საარსებო შემწეობის მიმღებთა რაოდენობა დაახლოებით 570 000-მდე შემცირდა. სოციალური მომსახურების სააგენტოს მონაცემებით, მხოლოდ ივლისთან შედარებით მათი რაოდენობა 6 546-ით შემცირდა, ხოლო იანვართან შედარებით კლება თითქმის 140 000 ადამიანს შეადგენს.
საარსებო შემწეობის მიმღებთა საერთო რაოდენობიდან 153 258 ადამიანი სახელმწიფო დასაქმების პროგრამაშია ჩართული. პროგრამა 2026 წლიდან აღარ გაგრძელდა, თუმცა ის პირები, რომლებსაც ოთხწლიანი პერიოდი ჯერ არ დაუსრულებიათ, სისტემაში კვლავ რჩებიან.
სარჯველაძის განცხადებით, ოჯახების სოციალურ-ეკონომიკური მდგომარეობის გადამოწმება მომავალშიც გაგრძელდება, რათა სოციალური დახმარება იმ ოჯახებს მიეწოდოს, რომლებიც შესაბამის კრიტერიუმებს აკმაყოფილებენ.
