თურქეთი განახლებადი ენერგეტიკის მასშტაბურ განვითარებას გეგმავს. ქვეყნის ენერგეტიკისა და ბუნებრივი რესურსების მინისტრმა ალფარსლან ბაირაქტარმა ახალი სტრატეგია „National Energy 2040“ წარადგინა, რომელიც ქარისა და მზის ენერგიის წარმოების მნიშვნელოვან ზრდას ითვალისწინებს.
გეგმის მიხედვით, 2040 წლისთვის თურქეთში ქარისა და მზის ელექტროსადგურების საერთო სიმძლავრე 175 გიგავატს მიაღწევს, რაც დღევანდელ მაჩვენებელზე თითქმის ოთხჯერ მეტია. ამ მიმართულებით დაახლოებით 100 მილიარდი დოლარის ინვესტიცია იგეგმება.
ქვეყანა განსაკუთრებულ ყურადღებას ქარის ელექტროსადგურების განვითარებას დაუთმობს. დაგეგმილია როგორც ახალი ტურბინების მონტაჟი, ისე არსებული სადგურების მოდერნიზაცია. ამასთან, 2040 წლისთვის ზღვაში განთავსებული ქარის ელექტროსადგურების სიმძლავრემ 6 გიგავატს უნდა მიაღწიოს.
თურქეთის ენერგეტიკული სტრატეგია ჯამში 500 მილიარდი დოლარის ინვესტიციას მოიცავს. თანხა განახლებადი ენერგიის გარდა, ელექტროგადამცემი ქსელების, ატომური ენერგეტიკისა და სხვა ენერგეტიკული ინფრასტრუქტურის განვითარებას მოხმარდება.
მინისტრის განცხადებით, მთავარი მიზანი იმპორტირებულ ენერგორესურსებზე დამოკიდებულების შემცირება, ენერგეტიკული უსაფრთხოების გაძლიერება და გარემოზე უარყოფითი ზემოქმედების შემცირებაა.
გეგმა გაეროს კლიმატის კონფერენციის, COP31-ის წინ წარადგინეს, რომელსაც თურქეთის ქალაქი ანტალია 9 ნოემბრიდან უმასპინძლებს.
მიუხედავად განახლებადი ენერგიის განვითარების გეგმებისა, თურქეთის ელექტროენერგიის წარმოებაში ქვანახშირს კვლავ მნიშვნელოვანი ადგილი უკავია.
ახალი სტრატეგიის განხორციელების შემთხვევაში, თურქეთში ქარისა და მზის ენერგიის წარმოების შესაძლებლობები მნიშვნელოვნად გაიზრდება.