გორის მუნიციპალიტეტის სოფელ კირბალში XVIII–XIX საუკუნეების კვირაცხოვლის ეკლესია მძიმე მდგომარეობაშია. ადგილობრივი მოსახლეობა ისტორიული ტაძრის გადარჩენას და შესაბამისი უწყებების დროულ რეაგირებას ითხოვს.
მოსახლეობის ინფორმაციით, ეკლესიას სასწრაფო გამაგრება და სარეაბილიტაციო სამუშაოები ესაჭიროება. ადგილობრივები შიშობენ, რომ სამუშაოების დაგვიანების შემთხვევაში ისტორიული ნაგებობა შესაძლოა დაინგრეს.
კვირაცხოვლის ეკლესია სოფლის ისტორიული და კულტურული მემკვიდრეობის ნაწილია. საქართველოს ეროვნული ენციკლოპედიის მიხედვით, იგი XVIII–XIX საუკუნეებით თარიღდება და ერთნავიან ნაგებობას წარმოადგენს.
ადგილობრივები შესაბამის უწყებებს ეკლესიის მდგომარეობის შესწავლისა და მისი შესანარჩუნებლად აუცილებელი ღონისძიებების გატარებისკენ მოუწოდებენ.
ამ ეტაპზე უცნობია, იგეგმება თუ არა ტაძრის რეაბილიტაცია და როდის შეიძლება დაიწყოს შესაბამისი სამუშაოები. ასევე არ გამოქვეყნებულა სპეციალისტების დასკვნა, რომელიც ნაგებობის დაზიანების ხარისხსა და დანგრევის უშუალო საფრთხეს დაადასტურებდა.
