თბილისში, სახელმწიფო სამხედრო-სამეცნიერო-ტექნიკური ცენტრ „დელტას“ ტერიტორიაზე ხანძარი გაჩნდა. ცეცხლი ერთ-ერთ ძველ შენობას მოედო, რომელიც ამჟამად ექსპლუატაციაში არ იმყოფება და სადაც სარემონტო სამუშაოები მიმდინარეობდა.
შემთხვევა 10 ოქტომბერს, გვიან საღამოს მოხდა. ადგილზე მეხანძრე-მაშველები და შესაბამისი სამსახურები მუშაობდნენ. მათი სწრაფი რეაგირების შედეგად ხანძრის ლოკალიზება მოკლე დროში მოხერხდა, მოგვიანებით კი ცეცხლი სრულად ჩააქრეს.
11 ოქტომბერს სახელმწიფო სამხედრო-სამეცნიერო-ტექნიკურმა ცენტრმა „დელტამ“ ოფიციალური განცხადება გაავრცელა და დაადასტურა, რომ ხანძარი ექსპლუატაციიდან გამოსულ ნაგებობაში გაჩნდა.
ამ დროისთვის უცნობია, რამ გამოიწვია ხანძარი. მიმდინარეობს გამომწვევი მიზეზების დადგენა.
ასევე არ გავრცელებულა დაზიანებული შენობისა და შესაძლო მატერიალური ზარალის შესახებ დეტალური ინფორმაცია.
„დელტა“ საქართველოს თავდაცვის სამინისტროს სისტემაში მოქმედი სახელმწიფო სამხედრო-სამეცნიერო-ტექნიკური ცენტრია, რომელიც სამხედრო და სამოქალაქო დანიშნულების ტექნოლოგიების განვითარებაზე მუშაობს.
