საქართველოში ჩატარებული მასშტაბური საიმიგრაციო შემოწმებების შედეგად 64 უცხო ქვეყნის მოქალაქე დააკავეს. შინაგან საქმეთა სამინისტროს ინფორმაციით, აღნიშნული პირები ქვეყანაში კანონიერი საფუძვლის გარეშე იმყოფებოდნენ.
მიგრაციის დეპარტამენტის თანამშრომლებმა სპეციალური ღონისძიებები ქვეყნის მასშტაბით ჩაატარეს. შემოწმდა სხვადასხვა ლოკაცია და ობიექტი, სადაც საქართველოში ყოფნის კანონიერებას ამოწმებდნენ.
დაკავებულებს შორის არიან იორდანიის, პაკისტანის, თურქეთის, რუსეთის, ინდოეთის, ბანგლადეშის, აზერბაიჯანის, თურქმენეთის, ჩინეთის, ტაილანდისა და უზბეკეთის მოქალაქეები.
უწყების ცნობით, 64-ვე პირი მიგრაციის დეპარტამენტის დროებითი განთავსების ცენტრში გადაიყვანეს. ამჟამად მიმდინარეობს მათი საქართველოდან გაძევებისთვის კანონით გათვალისწინებული პროცედურები.
შინაგან საქმეთა სამინისტრო ასევე ავრცელებს ინფორმაციას, რომ შესაბამისი საკანონმდებლო ცვლილებების ამოქმედებიდან დღემდე, სპეციალური საიმიგრაციო კონტროლის ფარგლებში, საქართველოში 20 000-ზე მეტი უცხო ქვეყნის მოქალაქე გადაამოწმეს.
აღსანიშნავია, რომ აღნიშნული დაკავებები საიმიგრაციო კანონმდებლობის დარღვევას უკავშირდება და არა სისხლის სამართლის დანაშაულის ბრალდებას. დაკავებული პირების გაძევების პროცედურები ჯერ დასრულებული არ არის.
