უკრაინის პრეზიდენტის ოფისის ხელმძღვანელის, კირილო ბუდანოვის განცხადებით, რუსეთის ქმედებებსა და განცხადებებს საერთაშორისო საზოგადოებამ მკაცრი და გადამწყვეტი რეაგირებით უნდა უპასუხოს. მისი შეფასებით, წინააღმდეგობის გარეშე მოსკოვი ზეწოლისა და მოთხოვნების გაფართოებას გააგრძელებს. ბუდანოვმა ამის შესახებ NewsForce-თან ინტერვიუში ისაუბრა.
ბუდანოვის თქმით, ისტორიაში არაერთხელ ყოფილა შემთხვევა, როდესაც აგრესიული პოლიტიკის მიმართ არასაკმარისმა რეაგირებამ ვითარების კიდევ უფრო გამწვავებას შეუწყო ხელი. მისი შეფასებით, მსგავსი ტენდენცია დღესაც შეინიშნება და რუსეთის რიტორიკა თანდათან უფრო მკაცრი ხდება.
უკრაინის პრეზიდენტის ოფისის ხელმძღვანელი ყურადღებას ამახვილებს იმაზეც, რომ რუსეთის მხრიდან გაკეთებული განცხადებები, მისი შეფასებით, უკვე მხოლოდ უკრაინას აღარ ეხება. ბუდანოვის თქმით, მუქარის შემცველი რიტორიკა დასავლეთის სხვა ქვეყნების მიმართაც ისმის.
ბუდანოვი მიიჩნევს, რომ არსებული ვითარება ისტორიულად ნაცნობ სცენარს ჰგავს, როდესაც აგრესიული სახელმწიფო ცდილობს გააფართოოს მისთვის დასაშვები მოქმედებების საზღვრები. სწორედ ამიტომ, მისი აზრით, საერთაშორისო პარტნიორების მკაფიო პოზიციას განსაკუთრებული მნიშვნელობა აქვს.
ამასთან, ბუდანოვმა ბოლო დღეებში ცეცხლის შეწყვეტის საკითხზეც ისაუბრა. მისი განცხადებით, უკრაინა მხარს უჭერს საბრძოლო მოქმედებების დაუყოვნებლივ შეწყვეტას, თუმცა, მისი შეფასებით, რუსეთი ამ შეთავაზებაზე თანხმობის ნაცვლად უარის თქმის მიზეზებს ეძებს.
