მომღერალ მიშო სულუხიასა და შინაგან საქმეთა სამინისტროს შორის მომხდარ ინციდენტზე ურთიერთგამომრიცხავი ვერსიები ვრცელდება. მომღერალი პოლიციელებად წარმოდგენილ პირებს ფიზიკურ ძალადობაში ადანაშაულებს, უწყება კი აცხადებს, რომ სულუხია სამართალდამცველების კანონიერ მოთხოვნას არ დაემორჩილა და შემთხვევის ადგილიდან გაიქცა.
შინაგან საქმეთა სამინისტროს განმარტებით, სამართალდამცველებმა მომღერალი ლისის მიმდებარედ, ტყის მასივში გადაადგილებისას გადამოწმების მიზნით შეაჩერეს. უწყების ვერსიით, მან პოლიციელების მოთხოვნა არ შეასრულა, მობილური ტელეფონი ძირს დააგდო და ტერიტორია დატოვა.
შსს-ს ცნობით, ადგილზე დარჩენილი ტელეფონი და მის ბუდეში მოთავსებული საბანკო ბარათი დადგენილი წესით დაილუქა. მომხდართან დაკავშირებით დაწყებულია ადმინისტრაციული წარმოება ადმინისტრაციულ სამართალდარღვევათა კოდექსის 173-ე მუხლით, რომელიც პოლიციის კანონიერი მოთხოვნისადმი დაუმორჩილებლობას ითვალისწინებს.
თავად მიშო სულუხია მომხდარს განსხვავებულად აღწერს. მისი განცხადებით, ლისის ტბის მიმდებარედ სამოქალაქო ფორმაში ჩაცმული პირები, რომლებიც თავს პოლიციელებად აცნობდნენ, მას ფიზიკურად გაუსწორდნენ.
მომღერალი ამტკიცებს, რომ მას ტელეფონი წაართვეს და დაუზიანეს. მისივე მონაყოლით, ადგილზე შენიშნა, როგორ ამზადებდნენ აღნიშნული პირები შავი საიზოლაციო ლენტით გადახვეულ ნივთს, რის შემდეგაც გაქცევა მოახერხა.
სულუხიას განცხადებით, სამართალდამცველებმა ასევე დააკავეს ტაქსის მძღოლი, რომლის ავტომობილითაც ის გადაადგილდებოდა.
ამ ეტაპზე მხარეების მონათხრობი ერთმანეთს არ ემთხვევა. მომღერლის მიერ გაჟღერებული ძალადობის ბრალდებები დამოუკიდებლად დადასტურებული არ არის. ასევე უცნობია, დაიწყო თუ არა მათზე ცალკე გამოძიება.
