2026 წლის აბიტურიენტებისთვის ე.წ. მეორადი ჩარიცხვის პროცესი დაიწყო. შეფასებისა და გამოცდების ეროვნული ცენტრის ინფორმაციით, თავისუფალი ადგილების მქონე უმაღლესი და პროფესიული საგანმანათლებლო პროგრამების არჩევა 5 ოქტომბრის 11:00 საათიდან 9 ოქტომბრის 18:00 საათამდე იქნება შესაძლებელი.
მეორად ჩარიცხვაში მონაწილეობა შეუძლია აბიტურიენტს, რომელმაც ერთიან ეროვნულ გამოცდებზე თითოეული საგნისთვის განსაზღვრული მინიმალური კომპეტენციის ზღვარი გადალახა, თუმცა ჩარიცხვის უფლება ვერ მოიპოვა. პროცესში მონაწილეობა ასევე შეუძლიათ მათ, ვინც ეროვნული გამოცდებისთვის დადგენილი მინიმალური ზღვარი ვერ გადალახა, თუმცა პროფესიული საგანმანათლებლო პროგრამებისთვის განსაზღვრული შესაბამისი ზღვარი დაძლია.
პროგრამის ასარჩევად აბიტურიენტი უნდა შევიდეს შეფასებისა და გამოცდების ეროვნული ცენტრის სარეგისტრაციო პორტალზე, აირჩიოს „ერთიანი ეროვნული გამოცდები - მეორადი ჩარიცხვა“, გაიაროს ავტორიზაცია პირადი ნომრითა და არსებული პაროლით და შემდეგ მიუთითოს სასურველი პროგრამები.
პროგრამების ჩამონათვალი და თავისუფალი ადგილების შესახებ ინფორმაცია მოცემულია განახლებულ ელექტრონულ „ცნობარში აბიტურიენტებისთვის“. არჩევისას მნიშვნელოვანია პროგრამის მოთხოვნების, მინიმალური კომპეტენციის ზღვრისა და პრიორიტეტების სწორად გადამოწმება.
